میڈرڈ: اسپین میں 22 افراد کو جان بوجھ کر کورونا سے بیمار کرنے والے شخص کو پولیس نے بالاآخر پکڑ لیا ہے، مذکورہ شخص نے علامات ہونے کے باوجود کورونا ایس اوپیز کی پاسداری نہیں کی اور ماسک نیچے کرکے معمولات زندگی ادا کرتا رہا، جس کے باعث آفس کے 5 کولیگز اور جیم کے 3 ساتھیوں کو بھی کورونا میں مبتلا کیا۔
غیر ملکی میڈیا کے مطابق اسپین کے جزیرے مایورکا کے رہائشی 40 سالہ شخص نے کورونا کی علامتیں اور 102 ڈگری بخار ہونے کے باوجود نہ صرف دفتر جاتا رہا بلکہ جیم کا ناغہ بھی نہیں کیا۔ جس کے باعث مذکورہ شخص کے آفس کے 5 ساتھی اور جیم کے 3 ساتھی کورونا میں مبتلا ہوگئے، جبکہ اسی شخص کے اہل خانہ اور فیملی فرینڈرز میں سے بھی 14 افراد میں کورونا کی تصدیق ہوئی ہے، یہ 22 افراد اس شخص سے ملتے رہے تھے جس پر پولیس نے مذکورہ شخص کو گرفتار کرلیا تاہم ملزم کی شناخت ظاہر نہیں کی گئی ہے۔
پولیس کا کہنا ہے کہ علامتیں ظاہر ہونے پر اس شخص نے اپنا ٹیسٹ کرایا اور رپورٹ آنے کا انتظار کرنے کے بجائے لیب سے براہ راست آفس چلا گیا۔ آفس کولیگز نے اسے واپس جانے کو کہا لیکن اس نے اپنا ماسک نیچے کرکے کہا کہ میں تم سب کو کورونا سے بیمار کردوں گا، اگلے روز اس شخص کی کورونا رپورٹ مثبت آگئی۔
