کراچی: روس کے حملے کے بعد یوکرین میں پھنسے پاکستانی شہریوں اور طلبا کی واپسی کے لیے قومی ائیرلائن میدان میں آگئی، سی ای او پی آئی اے ارشد ملک کا یوکرین میں تعینات پاکستانی سفیر سے رابطہ، پاکستانیوں کو واپس لانے کیلئے حوالے لائحہ عمل ترتیب دے دیا۔
میڈیارپورٹس کے مطابق سی ای او پی آئی اے ارشد ملک اور یوکرین میں پاکستانی سفیر میجر جنرل (ر) نوئل کھوکھر کے درمیان رابطہ ہوا ہے جس میں یوکرین میں پھنسے پاکستانی شہریوں کی محفوظ مقام پر منتقلی اور وطن واپسی سے متعلق گفتگو کی گئی۔ ذرائع کے مطابق تمام پاکستانی طالب علم یوکرین کے شہر ٹرنوہل میں یکجا ہوں گے، جہاں سفارتخانہ زمینی راستے سے تمام طلبا کو پولینڈ منتقل کرے گا۔ اس کے بعد پی آئی اے کا بوئنگ 777 طیارہ پولینڈ سے طلبہ کو وطن واپس پہنچائے گا۔
سی ای او پی آئی اے ارشد ملک کا کہنا ہے کہ پرواز کی تیاری کی جارہی ہے، طالبعلموں کے پولینڈ پہنچتے ہی پرواز روانہ کردی جائے گی، ہم وطنوں کو ان کے گھروں تک واپس پہنچانے کیلئے ہر ممکن اقدامات کریں گے۔ انہوں نے کہا کہ پی آئی اے کی یہی روایت ہے کہ جب ملک کو ضرورت پڑتی ہے وہ قدم بڑھاتی ہے۔ علاوہ ازیں پاکستانی سفارتخانے کا کہنا ہے کہ پولینڈ نے کورونا پاندیاں معطل کردی ہیں، پاکستانی شہری 15 روز میں پولینڈ میں داخل ہوسکتے ہیں۔
