حوثی باغیوں کا ابو ظہبی پر ڈرون حملہ، پاکستانی ورکر سمیت 3 جاں بحق، 6 زخمی

ابو ظہبی: متحدہ عرب امارات کے دارالحکومت ابوظہبی میں آئل ٹینکرز میں دھماکے سمیت آگ لگنے کے دو واقعات کے نتیجے میں ایک پاکستانی سمیت 3 افراد ہلاک جبکہ 6 زخمی ہوگئے، ایک کی حالت تشویشناک بتائی جارہی ہے۔ دھماکے ادنوک تیل کمپنی کے قریب تین آئل ٹینکروں میں ہوئے۔

عالمی خبر رساں ادارے کے مطابق ابوظہبی پولیس کا کہنا ہے کہ شہر میں دو دھماکے سنے گئے، جس کے نتیجے میں خوفناک آگ بھڑک اٹھی، حکام کا کہنا ہے کہ ایک دھماکا 3 آئل ٹینکرز میں جب کہ دوسرا زیر تعمیر ایئرپورٹ پر ہوا ہے، دونوں مقامات پر آگ بجھانے کی کوشش جاری ہے۔ ابو ظہبی پولیس کا کہنا ہے کہ دھماکوں میں آئل ٹینکر کے پھٹنے سے 3 افراد ہلاک اور 6 زخمی ہوئے، ہلاک اور زخمی ہونے والوں کو قریبی اسپتال منتقل کردیا گیا ہے جہاں ایک زخمی کی حالت نازک بتائی جارہی ہے۔ اماراتی خبر رساں ایجنسی کے مطابق حملے میں ہلاک ہونے والے ایک شخص کا تعلق پاکستان جبکہ دو کا تعلق بھارت سے ہے۔

متحدہ عرب امارات کی جانب سے تاحال کسی کو واقعے کا ذمہ دار نہیں ٹھہرایا گیا ہے اور نہ ہی آئل ٹینکرز پھٹنے کی وجہ سے آگاہ کیا گیا ہے تاہم واقعے کی تحقیقات کے لیے انکوائری کمیٹی تشکیل دیدی گئی ہے۔ ابوطہبی حکام کی جانب سے دھماکے کی نوعیت سے متعلق کچھ نہیں بتایا گیا، پولیس نے کہا ہے کہ ’ابتدائی تفتیش سے معلوم ہوا ہے کہ مذکورہ علاقوں میں چھوٹے اجسام کی پروازیں ریکارڈ کی گئی ہیں جن سے اندازہ ہوتا ہے کہ کوئی چھوٹے ڈرون تھے جن کی وجہ سے حادثے ہوا ہوگا۔‘ دوسری جانب یمن کے حوثی باغیوں نے اس حملے کی ذمہ داری قبول کرلی ہے۔