ناپولی: اٹلی میں چرچ میں عبادت کرنے والوں کو لوٹنے کی کوشش کی گئی ہے، مزاحمت پر ایک شخص کو زخمی بھی کردیا، تاہم پولیس نے اطلاع ملنے پر فوری کارروائی کی ہے، جس پر ملزم کو دھرلیا گیا، یہ واقعہ ناپولی کے علاقے Sorrento میں پیش آیا ہے۔
تفصیلات کے مطابق اٹلی میں ناپولی کے علاقے Sorrento کے مرکز میں واقع چرچ میں ایک شخص عبادت کے بہانے داخل ہوا، تاہم جب اس نے چرچ کے اندر صرف دو لوگ ایک عورت اور ایک مرد کو عبادت میں مصروف پایا، تو اس کی نیت خراب ہوگئی ، اس نے بھکاری کی طرح دونوں سے پیسے مانگنے شروع کردئیے، اور تنگ کرنے لگا کہ اسے پیسے دئیے جائیں، جب چرچ میں موجود دونوں عورت اور مرد نے اس سے جان چھڑانے کی کوشش کی ، اور پیسے دینے سے انکار کیا، تو مذکورہ شخص نے پیچ کس نکال لیا اور انہیں ڈرانے لگا کہ فوری پیسے نکال کر اسے دیں۔
اس دوران اس نے چرچ میں موجود مرد پر پیچ کس سے حملہ بھی کیا، جس سے اسے خراشیں آئیں، تاہم مذکورہ شخص پولیس کا ریٹائرڈ اہلکار تھا، اس نے اپنے تجربے کا استعمال کرتے ہوئے مزاحمت کی اور اس دوران چرچ میں موجود خاتون نے پولیس کو فون کردیا،جس پرحملہ آور چرچ سے فرار ہوگیا ۔تاہم اس دوران پولیس بھی پہنچ گئی۔اور 36 سالہ ملزم کو گرفتار کرلیا۔
