بارسلونا: یوم کشمیر کے حوالے سے اسپین میں بڑی کانفرنس کا انعقاد کیا گیا ہے، جس میں ہسپانوی حکومتی اور اپوزیشن رہنماوں نے بھی شرکت کی، چیئرمین ای یو پاک فرینڈ شپ فیڈریشن یورپ چوہدری پرویز اقبال لوسر اور قونصل جنرل بارسلونا مرزا سلیمان بابر بیگ نے کشمیر کی صورت حال سے شرکا کو آگاہ کیا۔
تفصیلات کے مطابق یوم کشمیر کی مناسبت سے اسپین کے شہر بارسلونا کے نواحی بادالونا میں انٹرنیشنل کشمیرکانفرنس کا انعقاد کیا گیا جس میں مقامی ہسپانوی رہنماوں نے بھی شرکت کی، مہمان خصوصی قونصل جنرل مرزا سلیمان بابر بیگ تھے ، جبکہ ای یو پاک فرینڈ شپ فیڈریشن یورپ کے چیئرمین چوہدری پرویز اقبال لوسر نے برسلز سے خصوصی شرکت کی۔کانفرنس کا آغاز تلاوت قرآن مجید اور نعت رسول مقبول ﷺ سے ہوا۔نظامت کے فرائض کامران خان نے سر انجام دئیے۔کانفرنس سے مقررین نے خطاب کرتے ہوئے کہا کہ ہمیں مقامی آبادی کو مسئلہ کشمیر کی جانب متوجہ کرنے کی ضرورت ہے ۔ اس طرح کی کانفرنسز جس میں مقامی حکومتی اور اپوزیشن کے لوگ موجود ہوں ۔ مسئلہ کشمیر کو عالمی سطح پر اجاگر کرنے میں مدد دیتی ہیں۔
قونصل جنرل مرزا سلیمان بابر بیگ نے اپنے خطاب میں مقامی ہسپانوی حکومتی اور اپوزیشن نمائندوں کو بتایا کہ مقبوضہ کشمیر میں گزشتہ کم وبیش تین سال سے لاک ڈاون لگا ہوا ہے۔بنیادی ضروریات زندگی کی فراہمی بھی ممکن نہیں ہے۔ انہوں نے کہا کہ اگر آپ بھی مقبوضہ کشمیر جانا چاہیں اور وہاں کے حالات کو دنیا کے سامنے لانا چاہیں تو بھارتی حکومت اس کی اجازت نہیں دیتی۔
دوسری جانب میں آپ لوگوں کو آزاد کشمیر کا فری ویزہ دیتا ہوں، آپ جائیں اور وہاں کے حالات کو دیکھیں، آپ خود جان جائیں گے کہ بھارت کس طرح نہتے کشمیریوں پر ظلم کے پہاڑ توڑ رہا ہے۔ انہوں نے پاکستانی کمیونٹی کو مخاطب کرتے ہوئے کہا کہ اب جنگ میزائل کی نہیں، بلکہ اب سوشل میڈیا کی جنگ ہے، جس میں آپ کو آگے بڑھنا چا ہئے ۔ یورپی عوام کو بتائیں کہ ہمارا ہمسایہ کشمیریوں کے ساتھ کیا سلوک کررہا ہے،
چئیرمین ای یو پاک فرینڈ شپ فیڈریشن یورپ چوہدری پرویز اقبال لوسر نے کہا کہ ہماری کوشش ہے کہ یورپی شہریوں کو کشمیر کے مسئلے اور کشمیریوں کی حالت زار سے آگاہ کریں، میں پاکستانیوں سے کہتا ہوں کہ سیاسی جماعتوں کو ادھر چھوڑ دیں ،اور صرف ایک سبز ہلالی پرچم تلے جمع ہوجائیں ۔دنیا عزت کرے گی،اپنے بچوں کو یہاں کی سیاسی جماعتوں اور اعلی تعلیم کے لئے آگے لے کر جائیں ،تو ہماری آواز ان کے ایوانوں تک پہنچے گی۔
