راولپنڈی:جنوبی وزیرستان کے علاقے شکئی میں سیکیورٹی فورسز کی پیٹرولنگ ٹیم پر گزشتہ رات دہشتگردوں کے حملے میں پاک فوج کا کیپٹن شہید ہوگیا، 25 سالہ کیپٹن عبداللہ کا تعلق کوہاٹ کے علاقے لاچی سے ہے۔
پاک فوج کے شعبہ تعلقات عامہ(آئی ایس پی آر) کی جانب سے جاری بیان کے مطابق شکئی کے علاقے میں دہشتگردوں کی موجودگی کی اطلاع پر گزشتہ رات سیکورٹی فورسز علاقے میں گشت پر تھے کہ ان کے قافلے پر دہشت گردوں نے فائرنگ کردی۔
آئی ایس پی آر کے مطابق دہشتگردوں کے ساتھ فائرنگ کے تبادلے میں کیپٹن عبداللہ شہید ہوگئے، واقعے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کردیا۔
خیال رہے کہ چند روز قبل شمالی وزیرستان میں بارودی سرنگ کے دھماکے میں پاک فوج کے افسر سمیت تین اہلکار شہید جبکہ 4 زخمی ہوگئے تھے۔
